جێگری سەرۆکی پەرلەمان هەڵوێستی هەرێمی کوردستانی له‌میانی پانێڵێکی دیداری رافیدەین خستەڕوو
ئەمڕۆ هەینی ۲۷ی ئەیلولی ۲۰۱۹، هێمن هەورامی جێگری سەرۆکی پەرلەمانی کوردستان لە رۆژی دووەمی دیداری رافیدەین بۆ ئاسایش و ئابووری کە لەبەغدا بەڕێوەدەچێت بەشداریی لە پانێڵێکدا کردو تیایدا تیشکی خستەسەر رەوشی سیاسی و ئابووری و ئاسایشی عێڕاق و هەرێمی کوردستان و گۆڕانکارییەکانی رۆژهەڵاتی ناوەڕاست و میحوەربەندییەکانی ناوچەکە.
لە میانەی پانێڵەکەدا جێگری سەرۆکی پەرلەمانی کوردستان سوپاسی ڕێکخەرانی دیداری رافیدەینی کرد لە کاتێکدا کەعێراق و ناوچەکە بەدۆخێکی هەستیاردا دەڕوات و ئەنجامدانی دیداری لەمجۆرەی بە گرنگ بۆ لێکنزیککردنەوەی بۆچوونەکان وەسفکرد له ڕووبەڕووبوونەوەی بیری توندڕەوی و بەهێزکردنی یەکڕیزی و بەرەنگاربوونەوەی ئەو کێشانەی بەرۆکی عێراق و هەرێمی کوردستانی گرتووە.
هەر لە پانێڵەکەدا هێمن هەورامی جێگری سەرۆکی پەرلەمانی کوردستان باسی لە ڕەنگدانەوەی هەڵوێستی هەرێمی کوردستان کرد لەو سیاسەت و ستراتیژییەتەی کە پیادەی دەکات بەمەبەستی لێکنزیکبوونەوەو هەنگاونان بۆ چارەسەرکردنی کێشە هەڵپه‌سێردراوەکان لەگەڵ بەغدا، هاوکات باسی لە دووبارە سەرهەڵدانەوەی ڕێکخراوی تیرۆریستی داعش کرد کە لەئێستادا دووبارە خەریکە بەهێز و گوڕوتینێکی ترەوە سەرهەڵدەدەنەوە،و دەگەڕێنەوە ئەو شوێنانەی کە پێشتر تێیدا بوونە، لەدرێژەی وتەکانیدا جێگری سەرۆکی پەرلەمان باسی لە پەیوەندییەکانی نێوان هەرێمی کوردستان و عێراق کردو ڕایگەیاند: "پێویستە کێشەکان لەچوارچێوەی دەستوور بەگفتوگۆ و هەنگاوی کرداری چارەسەر بکەین و هەوڵبدەین بێلایەنانە مامەڵە لەگەڵ ئەو گۆڕانکاری و گرژییانەی کە لەناوچەکە و ڕۆژهەڵاتی ناوه‌ڕاستدا هەیە بکەین، چونکە هەرێمی کوردستان بەپێی دەستوور بەشدارە لەو بەرپرسیارێتییانەی کە دەکەونە سەر عێراقی فیدڕاڵ لە ڕووبەڕووبوونەوەی ئەو مەترسییانەی لەناوەوە و دەرەوە ڕووبەڕوومان دەبێتەوە"، جێگری سەرۆکی پەرلەمانی کوردستان گره‌نتیی سەرکەوتنی هەرێمی کوردستان و بەغدای بە لێکنزیککەوتنەوه و چارەسەری کێشەکانی نێوانیان بەڕێگەی گفتوگۆو لەچوارچێوەی دەستووری عێراقی فیدڕاڵدا خستەڕوو.
