لیژنه‌ی یاسایی راپۆرت له‌باره‌ی پڕۆژه‌یاسای له‌ئه‌ستۆكردنی فه‌رمانبه‌ران له‌هه‌رێمی كوردستان ئاماده ده‌كات
به‌مه‌به‌ستی ئاماده‌كردنی راپۆرت له‌باره‌ی پێشنیازه‌یاسای له‌ئه‌ستۆكردنی فه‌رمانبه‌ران له‌هه‌رێمی كوردستان، سه‌عات 11ی پێشنیوه‌ڕۆی ئه‌مڕۆ چوارشه‌مه 2020/8/19، لیژنه‌ی كاروبارى یاسایی له‌په‌رله‌مانی كوردستان كۆبۆوه.
له‌كۆبوونه‌وه‌كه‌دا كه به‌ئاماده‌بوونی د.بژار كۆچه‌ر سه‌رۆكی لیژنه‌و ئاماده‌بوونی جێگری سه‌رۆكى لیژنه‌و بڕیارده‌رو ژماره‌یه‌ك له‌ئه‌ندامان و راوێژكارانی لیژنه‌كه به‌ڕێوه‌چوو. تێیدا گفتوگۆ له‌باره‌ی بڕگه‌و مادده‌كانی پرۆژه‌یاسای له‌ئه‌ستۆكردنی فه‌رمانبه‌ران له‌هه‌رێمی كوردستان-عێراق كرا، ئه‌م پڕۆژه‌یاسایه له‌لایه‌ن حكومه‌ته‌وه پێشكه‌شی په‌رله‌مانی كوردستان كراوه.
له‌كۆبوونه‌وه‌كه‌ی ئه‌مڕۆیدا، ئه‌ندامانی لیژنه‌ی یاسایی پێشنیازو تێبینییه‌كانیان له‌باره‌ی ناوه‌ڕۆكی ناوونیشان و ماده‌و بڕگه‌كان و هۆكاره‌كانی ده‌رچوواندنی پرۆژه‌یاساكه خسته‌روو.
بریاریشه سه‌عات 10:30ى سه‌رله‌به‌یانیی سبه‌ی 2020/8/20، كۆبوونه‌وه‌ی لیژنه‌ی یاسایی به‌رده‌وام بێت بۆ ته‌واوكردنی راپۆرته‌كه، دوای ته‌واوكردنی رێككاره‌كانی لیژنه‌كه، راپۆرته‌كه ئاراسته‌ی سه‌رۆكایه‌تیی په‌رله‌مانی كوردستان ده‌كرێت بۆ ته‌واوكردنی رێككاره‌یاساییه‌كانی خوێندنه‌وه‌ی دووه‌م.
جێی ئاماژه‌یه پڕۆژه‌یاسای له‌ئه‌ستۆكردنی فه‌رمانبه‌ران له‌هه‌رێمی كوردستان-عێراق، له‌دانیشتنی ژماره 6ی ئاسایی رۆژی 2020/7/27 خوێندنه‌وه‌ی یه‌كه‌می بۆ كراوه.