لیژنه‌ى داكۆكیكردن له‌مافى ئافره‌ت پڕۆژه‌یاساى گرنگ بۆ وه‌زرى نوێى یاسادانان ئاماده ده‌كات
به‌مه‌به‌ستى تاووتوێكردنى بابه‌تی ئه‌نجامدانى ژماره‌یه‌ك كۆبوونه‌وه‌ى نیشتیمانى به‌مه‌به‌ستى هۆشیاركردنه‌وه‌ى كۆمه‌ڵگه‌و ئاماده‌سازیكردن بۆ ئاماده‌كردنی چه‌ند پڕۆژه‌یاسایه‌كی گرنگ سه‌باره‌ت به‌ئافره‌تان، پێشنیوه‌ڕۆى ئه‌مڕۆ چوارشه‌مه 2020/2/26، لیژنه‌ى داكۆكیكردن له‌مافى ئافره‌ت له‌په‌رله‌مانی كوردستان به‌سه‌رپه‌رشتیى له‌نجه ئیبراهیم دزه‌یی سه‌رۆكى لیژنه‌و ئاماده‌بوونی جێگرى سه‌رۆكى لیژنه‌و ژماره‌یه‌ك له‌ئه‌ندامان و راوێژكارانى لیژنه‌كه كۆبووه‌وه.
له‌كۆبوونه‌وه‌كه‌دا تاووتوێى ئه‌نجامدانى ژماره‌یه‌ك كۆبوونه‌وه‌ى نیشتیمانى له‌گه‌ڵ رێكخراوه‌كانى داكۆكیكردن له‌مافى ئافره‌ت و نوێنه‌رى وه‌زاره‌ته‌كان و دادگاكان وه‌ك قۆناغى یه‌كه‌م كرا له‌مانگى ئادار به‌مه‌به‌ستى هۆشیاركردنه‌وه‌ى كۆمه‌ڵگه‌و له‌یه‌كترنزیككردنه‌وه‌ى لایه‌نه په‌یوه‌ندیداره‌دان له‌پێناو پاراستنى دیموكراسییه‌ت و مافه‌كانى ئافره‌تان.
هه‌ر له‌كۆبوونه‌وه‌كه‌دا باس له‌وه كرا كه‌راسپارده‌كانى قۆناغى كۆبوونه‌وه‌كانى نیشتیمانى له‌گه‌ڵ حكومه‌ت و په‌رله‌مان و دادوه‌ران و دادگاكان وه‌ك قۆناغى دووه‌م گفتوگۆى له‌سه‌ر بكرێت.
له‌كۆتایی كۆبوونه‌وه‌كه‌شدا لیژنه بڕیاریدا له‌م وه‌رزه‌ى یاسادانان گرنگترین پڕۆژه‌یاسا به‌تایبه‌ت بۆ ئه‌نجوومه‌نى باڵاى كاروبارى خانمان ئاماده بكات.