راپۆرتێكى هاوبه‌ش له‌سه‌ر دۆخی ناوچه كوردستانییه‌كانی ده‌ره‌وه‌ى ئیداره‌ى هه‌رێم ئاماده ده‌كرێت
به‌مه‌به‌ستی ئاماده‌كردنی راپۆرتێكى هاوبه‌ش سه‌باره‌ت به‌دۆخى ناوچه كوردستانییه‌كانی ده‌ره‌وه‌ى ئیداره‌ى هه‌رێم، پێشنیوه‌ڕۆی ئه‌مڕۆ یه‌كشه‌مه 2020/7/19، هه‌ردوو لیژنه‌ی ناوچه كوردستانییه‌كانی ده‌ره‌وه‌ى ئیداره‌ى هه‌رێم و لیژنه‌ی كاروبارى پێشمه‌رگه له‌په‌رله‌مانی كوردستان به‌سه‌رپه‌رشتیى جوان رۆژبەیانی سه‌رۆكی لیژنه‌ی ناوچه كوردستانییه‌كان و رێڤینگ هرۆری سه‌رۆكی لیژنه‌ی كاروبارى پێشمه‌رگه‌و ئاماده‌بوونی ئەندامان و راوێژکارانى هه‌ردوو لیژنه‌كه كۆبوونه‌وه.
له‌كۆبوونه‌وه‌كه‌دا دۆخی ناوچه كوردستانییه‌كانى ده‌ره‌وه‌ى ئیداره‌ى هه‌رێم و سیاسه‌تی ته‌عریبكردن و ده‌ربه‌ده‌ركردنی خه‌ڵكی ئه‌و ناوچانه‌و مه‌ترسیى میلیشیاكان له‌سه‌ر پێكهاته‌كان و هه‌روه‌ها مه‌ترسییه‌كانی تیرۆریستانی داعش و هه‌ماهه‌نگییه‌كانی نێوان هێزه‌كانی پێشمه‌رگه‌و هێزه‌كانی سوپای عێراق بۆ رووبه‌ڕووبوونه‌وه‌یان به‌چڕوپڕی تاووتوێ كران و بڕیاریشه راپۆرتێكی هاوبەش به‌داتاو به‌ئامارو كۆمه‌ڵێك راسپارده‌و داواكارى له‌لایه‌ن هه‌ردوو لیژنه‌كه‌وه له هه‌رێم و حكومه‌تی فیدرالیی عێراق لەسەر دۆخى ئه‌و ناوچانه ئاماده بكرێت و ئاراسته‌ی ده‌سته‌ی سه‌رۆكایه‌تیی په‌رله‌مان بكرێت به‌مه‌به‌ستی خستنه به‌رنامه‌ى كارى دانیشتنه‌كانی په‌رله‌مانه‌وه.