نیوەڕۆی ئەمڕۆ دووشەممە 2020/9/21، لیژنەیەکی لاوەکيی لەلیژنەی پەروەردەو خوێندنی باڵاو توێژنینەوەی زانستی، بەسەرۆکایەتی هەڵەز ئەحمەد و بە ئەندامێتی حەسیبە سەعید و فرید یعقوب ئەندامانی لیژنەو سیروان حسن شارەزای لیژنەکە، سەردانی وەزارەتی پەروەردەی حکومەتی هەرێمی کوردستانیان کرد، و لەلایەن د.ئالان حەمەسعید وەزیری پەروەردە و ڕاوێژکارانی وەزارەت پێشوازیان لێکرا.

لەکۆبونەوەیەکدا، شاندە پەرلەمانیەکە داوایان کرد، بابەتی پێدانی نازناوی زانستی چارەسەر بکرێت، و ئەوانەی شایستەن و بڕوانامەی ماستەریان بەدەست ھێناوە و کۆنمرەی پێویستیان ھەیە، ناونیشانەکانیان بگۆڕدرێت. لەمبارەیەوە وەزیری پەروەردە بەڵێنی چارەسەرکردنی ئەم باباتەی بە شاندەکە دا.

ھەر لەکۆبونەوەکەدا کۆمەڵێک بابەتی پەیوەندیدار بەکاروباری لیژنە و ئامادەکارییەکانی وەزارەتی پەروەردە بۆ دەسپێکردنەوەی دەوامی ئەمساڵ، و کۆمەڵێک کێشەو گرفتی مامۆستایان گفتوگۆیان لەسەر کرا.