لیژنەی شارەوانی کار لەسەر ھەمواری یاسای ئەو زەوییانە دەکات کە لەسنووری شارەوانییەکان زێدەڕۆییان له‌سه‌ر كراوه
بەمەبەستی گفتوگۆکردن لەسەر ھەمواری یاسای ژمارە ٣ی ساڵی ٢٠١٩، نیوەڕۆی ئەمڕۆ دووشەممە 2021/2/8، لیژنەی شارەوانی و گواستنەوەو گەیاندن و گەشتوگوزار، بەسەرپەرشتیی لوقمان وەردی سەرۆکی لیژنەو ئامادەبوونی جێگری سەرۆکی لیژنەو ئەندامان و ڕاوێژکارانی لێژنەکە کۆبووەوە.
لەکۆبوونەوەکەدا، گفتوگۆکرا لەسەر ئەو ماددەو بڕگانەی پێویستییان بەھەموارکردن و گۆڕانکاری ھەیە لەیاسای ژمارە ٣ی ساڵی ٢٠١٩ی یاسای بەخاوەنکردنی ئەوزەوییانەی لەسنووری شارەوانییەکان زێدەڕۆییان لەسەر کراوە، ئەمەش دوای ئەنجامدانی زنجیرەیەک کۆبوونەوەو دیدار لەگەڵ بەرپرسانی وەزارەتی شارەوانی و بەڕێوبەری گشتیی شارەوانییەکانی پارێزگاکان و ئیدارە سەربەخۆکان و وەرگرتنی ڕاو پێشنیازی کەسانی پسپۆڕو شارەزا له‌بوارەکە.
سەرۆک و ئەندامانی لیژنە ڕاو سەرنجی خۆیان لەسەر ماددەو بڕگەکان خستەڕوو و ڕاپۆرتی کۆتایی ھەموارەکەیان ئامادەکردو ئاراستەی سەرۆکایەتیی پەرلەمانیان کرد بۆ وەرگرتنی ڕێکارە پەیرەوییەکان بۆئەوەی خوێندنەوەی یەکەمی بۆ بکرێت.