سەرۆکی پەرلەمانی کوردستان پێشوازیی له كونسوڵی گشتیى کۆمارى هیند لە ھەرێمی کوردستان کرد
ئه‌مڕۆ دووشه‌ممه ٢٠٢٣/٤/٣، د. ڕێواز فائق، سەرۆکی پەرلەمانی کوردستان، پێشوازیی له سوبهاش چاندرا کاین، كونسوڵی گشتیى کۆمارى هیند لە ھەرێمی کوردستان کرد، كه به‌مه‌به‌ستى ماڵئاواییكردن و ته‌واوبوونی ئه‌ركه‌كه‌یان له هه‌رێمی كوردستان سه‌ردانی په‌رله‌مانی كردبوو.
له دیدارێكی نێوانیاندا، باسی گرنگی په‌یوه‌ندییه‌كانی نێوان هه‌ردوولا و به‌ره‌وپێشه‌وه‌بردنی ئاڵوگۆڕیی فه‌رهه‌نگی و ئابووریی نێوان هه‌رێمی كوردستان و ولاتی هیندستان كرا، سه‌رۆكی په‌رله‌مانی كوردستان، ڕۆڵی سوبهاش چاندرا، كونسوڵی گشتیى کۆمارى هیندستانی به‌رزنرخاند له‌و ئه‌ركانه‌ی كه له‌ماوه‌ی كاركردنیدا له هه‌رێمی كوردستان ئه‌نجامیداون. هاوكات لێكچوونی فه‌رهه‌نگی، فره‌یی و پێكه‌وه‌ژیانی ئاشتییانه‌ی نێوان پێكهاته جیاوازه‌كان، ته‌وه‌رێكی دیكه‌ی دیداره‌كه بوو.
له به‌شێكی دیكه‌ی دیداره‌كه‌دا، باس له پرسی خوێندنی باڵا و دابینكردنی كورسیی خوێندن بۆ ئه‌و خوێندكار و قوتابییانه‌ی هه‌رێمى كوردستان كه ئاره‌زوو ده‌كه‌ن له‌و ولاتى هیند بخوێنن كرا.
له كۆتایی دیداره‌كه‌شدا هه‌ردوولا جه‌ختیان له‌سه‌ر به‌ره‌وپێشه‌وه‌بردنی زیاتری په‌یوه‌ندییه‌كان كرده‌وه له سه‌رجه‌م بواره‌كاندا.
