ده‌سته‌ی سه‌رۆكایه‌تیی په‌رله‌مان و سه‌رۆك فراكسیۆنه‌كان لەسەر ھەمواری یاسای ھەڵبژاردن و کاراکردنەوەی کۆمیسیۆن كۆبوونه‌وه
ئه‌مڕۆ دووشه‌ممه ٢٠٢٣/١/٢٣، كۆبوونه‌وه‌ی نێوان ده‌سته‌ی سه‌رۆكایه‌تیی په‌رله‌مان و سه‌رۆكی فراكسیۆنه‌كان سه‌باره‌ت به پرسی هه‌مواركردنه‌وه‌ی یاسای هه‌ڵبژاردن و كاراكردنه‌وه‌ی كۆمیسیۆن له په‌رله‌مانی كوردستان به‌ڕێوه‌چوو.
له كۆبوونه‌وه‌كه‌دا گفتوگۆی تێروته‌سه‌ل له‌باره‌ی ڕێكاره یاساییه‌كان كرا بۆ خێراكردنی هه‌نگاوه‌كان و ئاماده‌كاری بۆ ئه‌نجامدانی هه‌ڵبژاردنی خولی شه‌شه‌مى په‌رله‌مانی كوردستان. ده‌سته‌ی سه‌رۆكایه‌تی و فراكسیۆنه‌كان جه‌ختیان كرده‌وه له‌سه‌ر ئه‌وه‌ی هه‌مووان پابه‌ندی ئه‌و ماوه یاساییه ده‌بن كه دیاریكراوه بۆ ئه‌نجامدانی هه‌ڵبژاردنه‌كان و هه‌مواركردنی یاسای هه‌ڵبژاردن و كاراكردنه‌وه‌ی كۆمیسیۆن.
له ته‌وه‌رێكی دیكه‌ی گفتوگۆكاندا باس له دروستكردنی زه‌مینه‌سازیی یاسایی و ته‌كنیكیی پێویست بۆ پرۆسه‌ی هه‌ڵبژاردنه‌كان كرا، سه‌رۆكی په‌رله‌مانی كوردستان، سوپاس و پێزانینی خۆی ئاراسته‌ی سه‌رۆكی فراكسیۆنه‌كان كرد به‌رامبه‌ر ئاماده‌گی و په‌رۆشیان بۆ گه‌یشتن به ڕێككه‌وتنێك كه تێیدا كۆده‌نگیی سه‌رجه‌م فراكسیۆنه‌كانی په‌رله‌مانی كوردستانی له‌سه‌ر بێت.
له كۆتایی كۆبوونه‌وه‌كه‌شدا بڕیار درا ده‌سته‌ی سه‌رۆكایه‌تیی په‌رله‌مان له‌به‌ر ڕۆشنایی ڕاوبۆچوونی فراكسیۆنه‌كانی په‌رله‌مانی كوردستان نه‌خشه‌ڕێگه‌ی كاركردن و جێبه‌جێكردنی ئه‌ركی په‌رله‌مان سه‌باره‌ت به هه‌ڵبژاردن ئاماده بكات و له كۆبوونه‌وه‌ی فراكسیۆنه‌كاندا بیخاته ڕوو.
