له‌په‌رله‌مانى كوردستان یادی ٤٤ ساڵه‌ی كۆچی دوایى بارزانیی نه‌مر به‌رز ڕاگیرا
سه‌عات ١٠:٣٠ى سەر لەبه‌یانیی ئه‌مڕۆ چوارشەممە ٢٠٢٣/٣/١، به ئاماده‌بوونی د. ڕێواز فائق، سه‌رۆكی په‌رله‌مانی كوردستان و د. هێمن هه‌ورامی، جێگرى سه‌رۆكی په‌رله‌مان و منى نبى قه‌هوه‌چى، سكرتێرى په‌رله‌مان و سه‌رۆك و ئه‌ندامانى په‌رله‌مانى كوردستان له فراكسیۆنه جیاوازه‌كانی په‌رله‌مان، له ته‌لارى په‌رله‌مان مه‌ڕاسیمێكى شایسته بۆ یادى ٤٤ ساڵه‌ی كۆچی دوایى ڕابه‌رى بزوتنه‌وه‌ى ڕزگاریخوازى كوردستان مه‌لا مسته‌فا-ى بارزانی به‌ڕێوه‌چوو.
له مه‌ڕاسیمه‌كه‌دا كه سه‌رۆكی دیوان و جێگری سه‌رۆكی دیوان و ڕاوێژكاران و به‌ڕێوه‌به‌ران و فه‌رمانبه‌رانی به‌شه جیاجیاكانی په‌رله‌مان ئاماده‌یبوون، ده‌سته‌ی سه‌رۆكایه‌تیی په‌رله‌مان و سه‌رۆك و ئه‌ندامانى په‌رله‌مانى كوردستان له فراكسیۆنه جیاوازه‌كان و ئاماده‌بووانی مه‌ڕاسیمه‌كه، تاجه‌گوڵینه‌ی ڕێز و وه‌فایان له‌به‌رده‌م وێنه‌ی مه‌لا مسته‌فا بارزانی دانا، وه‌ك ڕێزلێنانێك له خه‌بات و مێژووی پڕ سه‌ره‌وه‌ریی ئه‌و سه‌ركرده مه‌زنه.
