شاندێکی لێژنەی شارەوانی سەردانی پارێزگای سلێمانی دەکات

بەمەبەستی لە نزیکەوە ئاگاداربوون لە چۆنیەتیی هەنگاوەکانی جێبەجێکردنی یاسای بەخاوەنکردنی ئەو خانووانەی کە لە سنووری شارەوانییەکان زێدەڕۆییان له‌سەر كراوه‌، نیوەڕۆی ڕۆژی یەکشەممە ٢٠٢٣/٥/٧، شاندێکی لێژنەی شارەوانی و گواستنەوە و گەیاندن و گەشتوگوزار، بەسەرۆکایەتیی لوقمان وەردی، سەرۆکی لێژنە و ئه‌ندامیه‌تیی ڕزگار محه‌مه‌د و شیرین یونس، ئەندامانی لێژنەكه‌، سەردانی پارێزگای سلێمانیی کرد.
له‌میانی سه‌ردانه‌كه‌یاندا، لیژنه‌كه‌ لەگەڵ لێژنەی تاپۆکردنی ئەو زەوییانەی لە سنووری شارەوانییەکان زێدەڕۆییان له‌سەر كراوه‌، کۆبووەوە.
لە کۆبوونەوەکەدا هەنگاوەکان و گرفت و کێشەکانی بەردەم پرۆسەکە و دۆزینەوەی میکانیزمی گونجاو بۆئەوەی هاووڵاتییان بتوانن مامەڵەکانیان ڕایی بکەن و خانووەکانیان تاپۆ بکەن، گفتوگۆیان لەسەر کرا.
شایانی باسە لەماوەی ڕابردودا زیاتر لە سی هەزار هاووڵاتی تەنها لە سەنتەری شاری سلێمانی داواکارییان پێشکەش کردووە بۆ تاپۆکردنی خانووەکانیان، لێژنەکە لە کارکردن و به‌دواچوون له‌سه‌ر ئه‌و پرسه‌ بەردەوامە و لە ئایندەیەکی نزیکدا بەشێکی زۆری ئەو ھاوولاتییانەی کە داواکاریی تاپۆکردنی خانووەکانیان پێشکەش کردووە کارەکانیان تەواو دەبێت و خانووه‌كانیان لەسەر تاپۆ دەکرێت.